Yanga Sc itaanzia
nyumbani Novemba 2 katika Uwanja wa Benjamin Mkapa, Dar es Salaam
ikiwakaribisha Club Africain mchezo wa mtoano kusaka tiketi ya kutinga hatua ya
makundi.
Akizungumza jijini
Mwanza juzi Ijumaa na viongozi na wanachama wa matawi zaidi ya 25 kutoka mikoa
ya Kanda ya Ziwa, Hersi alisema uongozi umejiandaa kuhakikisha wanasonga mbele
huku akiwatahadharisha mashabiki na wanachama wa timu hiyo kujiandaa kwa lolote
na wasipende kulaumu pale timu inapoteleza.
Alisema mashabiki
wanapaswa kuwa nyuma ya timu wakati wote bila kuwa sehemu ya wanaoibomoa na
kuikana pale inapofungwa, huku akisisitiza ushindi kwenye mechi yao ya ligi
utawapa hali ya kujiamini kuelekea mchezo huo.
“Nataka niwahakikishie tutasonga mbele kwenda hatua ya makundi, siyo jambo baya kuumia kwa kitu unachokipenda, lakini usiipende Yanga Sc kisa inashinda ikifungwa siyo yako. umeipenda nembo ya Yanga, rangi na klabu, hujaipenda sababu ya matokeo, sisi tunapaswa kuwa na mapenzi na klabu hii na siyo mapenzi na matokeo, kama ni hivyo katafute kitu kingine cha kupenda.”
“Hili tatizo la kuipenda timu ikishinda tuachane nalo na watu kama hao siyo wana Yanga. Mfano Barcelona na Manchester United mara ya mwisho wamechukua ubingwa lini licha ya uwekezaji unaofanywa? Lakini kila siku wako nyuma ya timu yao,” >>alisema Hersi ambaye alitumia jukwaa hilo kuwashukuru wanachama kwa kumchagua kuwa Rais.
Kwa upande wake, Afisa
Habari wa Yanga Sc, Ali Kamwe alisema kama watashinda dhidi ya Geita Gold Fc na
kukaa kileleni itawajengea wachezaji na viongozi hali ya kujiamini dhidi ya
Club Africain kwani wamejipanga vyema kuwakabili waarabu hao. “Uhitaji wa alama
tatu kwenye mechi zilizo mbele yetu ni muhimu tukianza na Geita Gold ni mchezo
muhimu na ushindi utatujengea confidence,” alisema.